Иза сан кIант вац, цо ненан мотт бицбинехь…
Дуьненчу кхуллушехьа шенна мотт белла Дала х1ора а къомана, цуьнан шатайпаналлин уггар коьрта билгало а йина. Цундела и 1алашбан, кхион, цуьнан сий дан декхарийлахь ву х1ора а. Ткъа т1едог1уш доккха дезде ду—нохчийн маттан Де.
Зорба тоха. ДагадогIу суна тахана, со вина сан нана, Со кара ахь эцна, цу беша вай дахар. Хьайн хаза кIайн куьйгаш, стоьмаш тIе кхийдадеш, И генаш охьаийзош, гуш санна хета. Иштта дуьйцу шен иллехь нохчийн вевзачу илланчо Эльмурзаев Бекас.
Маржа, жималла мелла а чIиркъе а, сонта а хуьлуш хиллера-кх шел хьалха хIумма а ца хилча санна , дерриг а ша дийр ду а моьттуш. Сан а дара иштта цхьа шераш — хьенан ца хилла-кх… уьш! Дезткъе итталгIа шераш дарий-те моьтту суна, «Орга» альманахан — журнал алар къилахь долчу — редакце, «Наггахь, сайн сагатделча» цIе йолу дийцар дIа а кховдийна, со Сибрех дIавахна шераш. И поэт, соьгара дийцар дIаэцнарг «Орга» альманахан редактор , сайн ткъе цхьаъ шо долуш, дуьххьара гина вара суна, тхоьца, студенташца цхьанакхета, университете кхайкхина хилла. Цуьнца, поэтаца, кхин цхьа-ши стаг а вара — суна тахана дага ца вогIу я хIара а вогIур вацара, кхуо аьлла долу цхьа дешнаш сайна тамашийна хетта ца хилча: и дешнаш цо чу шарахь карладохуш а хезира суна. Вукху шимма, цуьнца хиллачара, цхьа декхарш а, даймохк а, турпалхой а бийцира — дерриш а тхуна цаоьшурш тхан шерашка хьаьжча я банне а бала боцурш.
